日本护肤专家：不同年龄层美肌方法大不同
2020-07-14
讲到护肤、美肌，好多人都会用大量贵价产品、做facial等，小资女确实无法承担咁多支出⋯⋯有冇啲日常做到嘅美肌方法呢？日本电视节目《ホンマでっか?!TV》中，日本护肤专家就提出咗，原来每个年龄阶层，係有唔同嘅食品可以促进美肌功效！一齐睇睇自己现阶段应该食咩嚟护肤啦！
肌肤老化速度取决于UV吸收量？！
据日本护肤专家泽田彰史所说，肌肤表面嘅老化速度，8成取决于UV嘅吸收量，减少外出率，会对皮肤较好⋯⋯
唔晒太阳，又点吸收维他命D？专家就话，其实每日只需手心面积咁大嘅皮肤，晒10～15分钟太阳吸收紫外线，就已经有充足嘅维他命D！
唔同年龄阶层嘅美肌效果食品
01｜10～19岁
十几岁嘅年龄，肌肤嘅烦恼多数为暗疮，而暗疮成因嘅其中一个原因係便秘！
专家指，便秘会令恶玉菌增加，继而令活性酸素产生，随住血流积聚到皮肤，形成暗疮。而便秘嘅原因，大多数情况下，都係因为食物纤维不足。
能够高效率地摄取食物纤维嘅食物就係芋丝！每300g芋丝就含有5～6g食物纤维。唔知点煮好嘅话，用芋丝取代一般麵条咁食就可以喇！
02｜20～29岁
踏入20岁，肌肤嘅主要烦恼都依然係暗疮问题，而呢个年龄阶层要消除暗疮问题，最重要嘅做法係摄取维他命C。
专家就推荐食红椒预防暗疮。红椒比青椒含有2倍多嘅维他命C，对美肌有唔错嘅功效。
专家仲话，其实食水果对皮肤竟然係唔好㗎！因为果糖会令血糖值急上升，产生活性酸素，成为生暗疮嘅原因。
03｜30～39岁
步入30岁，就渐渐变得不能够勉强嘅时期，而原因係因为缺铁！
铁质吸收，好多人都会谂到食红肉、鱼，但原来吸收效率最高嘅係食肝脏。
铁质不足就无法製造胶原蛋白，继而成为皱纹、下垂嘅原因。
04｜40～49岁
进入40岁，代表住已经步入几乎无法製造胶原蛋白嘅年龄。提到胶原蛋白，印象多为食鱼翅，但专家指鱼翅係高级食材，性价比好差，于是推荐食小白鱼乾。
一日需摄取嘅胶原蛋白大约为5g，而小白鱼乾就含有约22g！
以前有话即使食胶原蛋白，亦都唔会增加到身体内嘅胶原蛋白量，因为会被胺基酸所分解。但最近嘅研究就指，胶原蛋白中约有10％会作为胶原蛋白肽被吸收，能够促进肌肤细胞活动。
05｜50～59岁
到50岁，肌肤嘅老化原因係肠内恶玉菌。最好嘅解决方法係由食物中吸取善玉菌作补给，而最有效嘅食物就係纳豆。
但係生物学专家指，50岁后发生嘅食物过敏係好难痊癒嘅！所以要更小心注意饮食，记录低食咗之后感到不适嘅食品，管理好身体健康。
化妆对皮肤不构成伤害？！
美肌专家指，其实化妆带有一定防UV功效，对皮肤嘅伤害唔算太大，唔需要咁搏命去卸妆，卸唔乾净都好，但一定要喺40秒内完成卸妆过程！喺沖紧凉时等有湿气嘅环境下卸妆，係对皮肤最好嘅。
热门文章